عوام کوفوری انصاف کی فراہمی حکومت کی اولین ترجیح ہے،زرداری

اسلام آباد: صدر آصف علی زرداری نے کہا ہے کہ عوام کو سستے اور فوری انصاف کی فراہمی پیپلز پارٹی کی حکومت کی اولین ترجیح ہے ۔ ایوان صدر میں عشائیے پر سرحد بار کونسل کے چوبیس رکنی وفد سے گفتگو کرتے ہوئے صدر نے مطالبہ کیا کہ اعلیٰ عدلیہ میں تقرریاں حکومت اور اپوزیشن پر مشتمل پارلیمانی کمیٹی کے زریعے کی جائیں جس میں بار کونسلز کا کردار بھی شامل ہو ۔

صدر نے کہا کہ وہ سمجھتے ہیں کہ سپریم کورٹ سمیت اعلیٰ عدلیہ میں تعیناتی کے وقت سینیارٹی کے حصول کو مد نظر رکھا جائے ۔اعلیٰ عدلیہ میں سینئر وکلاء اور خواتین کو بھی حکومتی پالیسی کے مطابق تعینات کیا جائے ۔ انہوں نے کہا کہ وکلاء برادری نے جمہوریت ، قانون کی حکمرانی ، آئین کی بالادستی اور عدلیہ کی آزادی کی جدوجہد میں ہر اول دستے کا کردار ادا کیا ہے ۔

صدر مملکت کا کہنا تھاکہ حکومت فوری انصاف کی فراہمی میں وکلاء کے کردار کی اہمیت سے آگاہ ہے اور عوام کو فوری انصاف کی فراہمی یقینی بنانے کیلئے وکلا کو ہر طرح کی سہولیات فراہم کی جائیں گی ۔

وفد کے سربراہ اور سرحد بار کونسل کے وائس چیئرمین احمد فاروق خٹک نے وکلاء کیلئے ہاوسنگ اسکیم اور مفت طبی سہولیات سمیت متعدد مطالبات پیش کیے ۔انہوں نے وکلاء ہاسٹل کیلئے تین کنال رقبے پر مشتمل پلاٹ اور بیس کروڑ روپے مختص کرنے کا بھی مطالبہ کیا ۔

صدر نے وفد کو یقین دلایا کہ وکلاء کے جائز مطالبات پورے کیے جائیں گے اور سرحد بار کونسل کو بھی دیگر صوبوں کی بار کونسلوں کے برابر درجہ دیا جائے گا۔ ملاقات میں سردار لطیف کھوسہ ، بیرسٹر مسعود کوثر اور پیپلز لائر ز فورم کے دیگر وکلاء راہنماء بھی موجود تھے ۔

9 فروری, 2010