نیویارک: امریکی ادارے نے افغان جنگ میں معصوم شہریوں کی ہلاکتوں سے متعلق خفیہ دستاویزات افشاء کر دیں۔ پاکستان نے وکی لیکس کے عمل کو غیر ذمہ دارانہ قرار دے دیا۔ ادارے نے افغان جنگ میں نیٹو کی چھ سالہ کارروائیوں پرمشتمل نوے ہزار خفیہ دستاویزات افشاء کردی ہیں۔ ان دستاویزات میں نیٹو کے ہاتھوں ہلاک ہونے والے معصوم شہریوں کی آف دی ریکارڈ تفصیلات سامنے آئی ہیں۔ اس کے علاوہ افغان مزاحمت کاروں کے خلاف اسپیشل فورسز کے ماورائے قانون خفیہ آپریشنز کی تفصیلات بھی دستاویزات میں موجود ہیں۔
دستاویزات کے مطابق افغان سیکورٹی حکام طالبان حملوں کے آگے بے بس ہیں۔ وائٹ ہاوٴس نے دستاویزات افشاء ہونے پروکی لیکس کی مذمت کی ہے۔ دستاویزات میں پاکستان کی طالبان کے ساتھ خفیہ ملاقاتوں کا بھی ذکر کیا گیا ہے۔ امریکا میں پاکستانی سفیر حسین حقانی نے اپنے بیان میں کہا ہے کہ میدان جنگ سے معلومات کا افشاء ہونا غیرذمہ دارانہ عمل ہے۔ دستاویزات میں بتائی گئیں معلومات پاک افغان سرحد کے دونوں اطراف پائی جانے والی افواہوں کے سوا کچھ نہیں۔
26 جولائ 2010
|
